Даланзадгад сумын 1-р сургуулийн зарим барилгын дээврийн засвар
Даланзадгад сумын 1-р сургуулийн дэргэдэх 3 байр нь 1971 онд ашиглалтад орсон ба тус барилгуудад 1, 3-р сургуулийн 110 хүүхэд амьдардаг дотуур байр, 7 бүлгийн 500 сурагчийн багтаамжтай бага сургууль, 6 төрлөөр хүүхэд, багш хөгжүүлэх чиглэлээр үйл ажиллагаа явуулдаг “Говийн ирээдүй” сургалтын төв, 1-р сургуулийн дотуур байрны гал тогоо зэрэг байгууллагууд байрладаг. 2024 оны 4, 5 дугаар сард болсон байгалийн гамшигт үзэгдэл шороон шуурганаар дээрх 3 барилгуудын дээвэр хуурч 2-р давхрын өрөө тасалгаанд дусаал гоождог болсноос барилгуудын дотор заслыг муутгаж багш, сурагч, ажилчдын сурч, ажиллах орчин тав тухгүй болгосон тул тус барилгуудын дээврийг яаралтай засварлах зайлшгүй шаардлага тулгарсан.
Ханбогд сумын дулаан дамжуулах төв-5, УДДТ-5-н 1, 2-р хэлхээний гадна дулааны шугам сүлжээний ажил
2022 онд Ханбогд сум Дулааны станцын барилга, тоноглол, сумын төвийг бүхэлд нь хамруулсан дулааны 1, 2-р хэлхээний шугам сүлжээ, дулаан дамжуулах төвүүд гэх мэтээр иж бүрэн зураг төсөв хийлгэж Барилга хөгжлийн төвөөр батлуулсан. Одоогоор тус станцын барилга баригдаж дуусаж улсын комисст хүлээлгэн өгөх шатанд байгаа хэдий ч ус, дулаан дамжуулах төвүүд болон гадна шугам сүлжээний ажлууд эхлээгүй хэвээр байгаа тул дээрх ажлуудыг үе шаттай эхлүүлэх шаардлагатай байсан. Мөн сумын одоогийн уурын зуух нь сумын төвд шаардлагатай дулааны хэрэглээг хангаж чадахгүй болсон.
Манлай сумын ЕБС-ийн хиймэл зүлэг бүхий хөл бөмбөгийн талбай байгуулах
Хөл бөмбөг нь дэлхийн хамгийн олон хөгжөөн дэмжигчидтэй өргөн тархсан спорт юм. Тус спортоор хичээллэх нь эрүүл мэндийн олон талын ач холбогдолтойгоос гадна багаар ажиллах чадварыг хөгжүүлэх, хурдан сэтгэх, аливаа асуудалд дүн шинжилгээ өгөх чадвар хөгжих, тэсвэр хатуужил, хувийн сахилга сайтай болох, нийтэч болох, стресс бухимдлыг арилгах, өөрийгөө хүндлэх, өөртөө итгэлтэй болох зэргээр хүүхэд залуусыг зөв төлөвшүүлэх олон сайн талтай спортын төрөл юм. Манлай сумын Ерөнхий боловсролын сургуульд одоогийн байдлаар 375 хүүхэд суралцаж байгаа бөгөөд сумын хэмжээнд тусгайлсан хөл бөмбөгийн талбай байхгүй байгаа нь хүүхэд залуус тус спортоор хичээллэх боломж нөхцөл бүрдэж эхлээгүй байна.
Буянт хотхон УТҮГ-ын дэргэдэх "Динос ланд" хүүхдийн паркын гэрэлтүүлэг
Өмнөговь аймаг орон нутгийн төсвийн хөрөнгө оруулалтаараа 2015 онд Даланзадгад суманд 10 га талбайд хүүхдийн парк байгуулж иргэдийнхээ танин мэдэхүйн боловсрол, нутаг усаараа бахархан бахдах, чөлөөт цагаа зөв боловсон өнгөрөөх орчин нөхцөлийг бий болгожээ. Тус Динос ланд хүүхдийн паркад үйлчлүүлэгчдийн 80 шахам хувийг хүүхэд, залуучууд эзэлдэг. 2023 оны 6 дугаар сарын 1-ээс 10 дугаар сарын 1 хүртэл 4 сарын хугацаанд бага насны 67 хүүхэд асран хамгаалагчаасаа төөрсөн, 141 иргэн эд зүйлсээ алдсан, мөн өсвөр насны 14 хүүхэд гэмт хэрэгт холбогдсон гэх тоо баримт бүртгэгдсэн нь төслийг санаачлах үндэслэл болсон байна.
Даланзадгад дэд станцын хүчний трансформаторын хүчин чадал нэмэгдүүлж солих
Даланзадгад сумын дэд станцын трансформатор 2*10 МВА чадалтай ба нийт суурилагдсан 20МВА чадалтай. 2023-2024 оны өвлийн улиралд өмнөд бүсийн цахилгаан эрчим хүчний ачаалал 20 МВА-с хэтэрч зарим хэрэглэгчийг хязгаарлаж ажилласан ба 2024-2025 онд цахилгаан эрчим хүчээр хэвийн хангах боломжгүй байсан. Иймд тус аймгийн цахилгаан эрчим хүчний үндсэн эх үүсвэр болсон 110/35/10 кВ-н Даланзадгад дэд станцын трансформаторын хүчин чадлыг нэмэгдүүлэх зайлшгүй нөхцөл үүссэн.
Ханбогд сумын цэвэр бохирын шугам - 2023
Ханбогд сум нь суурин болон хөдөлгөөнт хүн амын төвлөрөл ихтэй томоохон сум бөгөөд 2023 оны статистикийн судалгаагаар тус суманд албан ёсны бүртгэлтэй 7986 хүн ам, 2193 өрх тоологдсон. Энэхүү томоохон суурин болон хөгжиж байгаа сумын хувьд иргэдийн эрүүл, аюулгүй орчинд тав тухтай амьдарч, ажиллах орчин, нөхцөлийг бүрдүүлэхэд нэн тэргүүнд сумын төвийн инженерийн шугам сүлжээг өргөтгөж гэр хорооллын айл өрхийг төвлөрсөн шугам сүлжээнд холбох нь чухал дэмжлэг болох юм.
Нутгийн үйлдвэрлэгч
Даланзадгад сумын хөгжлийн ерөнхий төлөвлөгөөнд үйлдвэржилтийн бүсийг тогтоож түүнд үйл ажиллагаа явуулах үйлдвэрийн төлөвлөлтийг гаргасан байдаг. Тус бүсэд барилгын чиглэлийн 7, хөнгөн үйлдвэрийн 8, хүнсний үйлдвэрийн 9, малын гаралтай түүхий эд боловсруулах болон бусад чиглэлийн 30 гаруй үйлдвэр үйл ажиллагаа явуулах боломжтойгоор төлөвлөсөн байна. Уг төлөвлөгөөг хэрэгжүүлэхийн тулд аймгийн хэмжээний үйлдвэрийн нөөц, кластер, бодлогын судалгаа хийх тухайн бүсийн дэд бүтцийн шугам сүлжээний ажлыг үе шаттайгаар шийдвэрлэх, хэрэгжүүлэх зайлшгүй шаардлагатай байгаа.
Дата төв байгуулах техник, эдийн засгийн үндэслэл, зураг төсөл, зах зээлийн судалгаа боловсруулах ажил
Өмнөговь аймаг нь уул уурхай, аялал жуулчлал, хөдөө аж ахуйн салбарыг түшиглэн хөгжиж буй аймаг тул цаашид орон нутгийн бизнес эрхлэгчдэд уул уурхайтай холбоотой болон холбоогүйгээр үүсэх боломж, эрсдэлийг тооцоолон орон нутгийн эдийн засаг, бизнесийн хөгжлийн шинэ түвшинд хүргэн хөгжүүлэх цогц бодлогын баримт бичиг боловсруулах, үе шаттай хэрэгжүүлэх бодит шаардлага тулгарч байна.
Даланзадгад сумын Гурван сайхан хорооллын 200 хүүхдийн цэцэрлэгийн барилга
Даланзадгад сумын шинэ суурьшлын бүсийн хамран сургах тойргийн сургуулийн өмнөх насны хүүхдүүдийг цэцэрлэгт бүрэн хамруулж чадахгүй байгаа, зарим хүүхдүүдийн хамрагдаж буй цэцэрлэг гэрээс нь 4-6 км хол байрлалтай байдаг нь хүүхэд, гэр бүлд бэрхшээлтэй байдаг. 2019 оны байдлаар Даланзадгад сумын Гурван сайхан, Нисэх, Баруун сайхан хорооллын хойд тал, Төгөл зэрэг алслагдсан гэр хороололд цэцэрлэгийн насны 300 хүүхэд бүртгэлтэй байсан.
