Ханбогд сумын дулаан дамжуулах төв-5, УДДТ-5-н 1, 2-р хэлхээний гадна дулааны шугам сүлжээний ажил
2022 онд Ханбогд сум Дулааны станцын барилга, тоноглол, сумын төвийг бүхэлд нь хамруулсан дулааны 1, 2-р хэлхээний шугам сүлжээ, дулаан дамжуулах төвүүд гэх мэтээр иж бүрэн зураг төсөв хийлгэж Барилга хөгжлийн төвөөр батлуулсан. Одоогоор тус станцын барилга баригдаж дуусаж улсын комисст хүлээлгэн өгөх шатанд байгаа хэдий ч ус, дулаан дамжуулах төвүүд болон гадна шугам сүлжээний ажлууд эхлээгүй хэвээр байгаа тул дээрх ажлуудыг үе шаттай эхлүүлэх шаардлагатай байсан. Мөн сумын одоогийн уурын зуух нь сумын төвд шаардлагатай дулааны хэрэглээг хангаж чадахгүй болсон.
Ханбогд сумын цэвэр бохирын шугам - 2023
Ханбогд сум нь суурин болон хөдөлгөөнт хүн амын төвлөрөл ихтэй томоохон сум бөгөөд 2023 оны статистикийн судалгаагаар тус суманд албан ёсны бүртгэлтэй 7986 хүн ам, 2193 өрх тоологдсон. Энэхүү томоохон суурин болон хөгжиж байгаа сумын хувьд иргэдийн эрүүл, аюулгүй орчинд тав тухтай амьдарч, ажиллах орчин, нөхцөлийг бүрдүүлэхэд нэн тэргүүнд сумын төвийн инженерийн шугам сүлжээг өргөтгөж гэр хорооллын айл өрхийг төвлөрсөн шугам сүлжээнд холбох нь чухал дэмжлэг болох юм.
Ханбогд сумын төвийн гадна цэвэр, бохирын шугамын угсралт
Ханбогд сум нь суурин болон хөдөлгөөнт хүн амын төвлөрөл ихтэй томоохон сум бөгөөд 2021 оны статистикийн судалгаагаар тус суманд албан ёсны бүртгэлтэй 8154 хүн ам, 1718 өрх тоологдсон. Энэхүү томоохон суурин болон хөгжиж байгаа сумын хувьд иргэдийн эрүүл, аюулгүй орчинд тав тухтай амьдарч, ажиллах орчин, нөхцөлийг бүрдүүлэхэд нэн тэргүүнд сумын төвийн инженерийн шугам сүлжээг өргөтгөж гэр хорооллын айл өрхийг төвлөрсөн шугам сүлжээнд холбох нь чухал дэмжлэг болох юм.
Гашуунсухайт боомтын хяналтын камераар тоноглогдсон цамхагт харуулын байр
Гашуунсухайт боомт нь экспортын бүтээгдэхүүнийг гадаад зах зээлд нэвтрүүлж буй гол боомт тул зорчих хөдөлгөөн ачаа тээврийн ачаалал маш их байдаг. Гэтэл боомтоор хүн, ачаа тээвэрлэж буй замын орчимд камержуулалт хангалтгүйгээс зөрчил илрүүлэх боломж сул байгаа нь төрийн байгууллага хяналт тавих, иргэдийн эрүүл мэнд, аюулгүй байдалд сөргөөр нөлөөлж болзошгүй эрсдэлээс урьдчилан сэргийлэх боломж муутай байна. Энэхүү сул талыг технологийн тусламжтайгаар шийдвэрлэх бололцоотой юм.
Ханбогд сумын цахилгаан шугамын өргөтгөл
Ханбогд сумын төвийн Жавхлант баг Шар дов хороололд 278 өрхийн 800 гаруй иргэд оршин суудаг бөгөөд одоогийн байгаа цахилгааны шугамын хүчин чадал, гэмтэл доголдлоос шалтгаалан цахилгааны хэрэглээ хязгаарлагдмал, найдваргүй байдаг.
Ханбогд сумын өвс тэжээлийн агуулах
Сүүлийн арван жилд Ханбогд сумын малын тоо толгой эрчимтэй өсч, өнгөрсөн жилийн мал тооллогоор 170 мянга гаруй мал тоологдсон нь сумын бэлчээрийн даацад сөргөөр нөлөөлж байна. Мөн тус суманд 4-5 жилийн давтамжтай ган, зуд болдог, Улаанбаатар хот, Сүхбаатар аймаг зэрэг 1000 гаруй километрийн зайтай газраас өвс, тэжээлээ татдаг зэрэг нь стандартын шаардлагад нийцсэн нөөцийн өвс, тэжээлийн агуулахтай болох нэн шаардлагатайг харуулж байна.
Ханбогд сумын 1-р сургуулийн бие засах газар
Өмнөговь аймгийн Ханбогд сумын 12 жилийн дунд сургуульд 950 гаруй хүүхэд суралцаж байгаа бөгөөд одоо ашиглаж байгаа сургуулийн барилга анх баригдахдаа багш, сурагчдад зориулсан ариун цэврийн өрөөг шийдвэрлээгүй ба нийтийн бие засах газрыг зайлшгүй байгуулах нь сургуулийн тулгамдсан асуудлын нэг болоод байна.
Үерийн далан, байгууламж
Ханбогд сумын төвийн газарзүйн байршил нь нам дор ба сумын төвийн баруун болон урд уулнаас үерийн ус их буудаг. 2015 онд дуу цахилгаантай аадар бороо 30 минут орох төдийд сумын төв бүхэлдээ усанд автаж төрийн болон иргэдийн өмч хөрөнгө ихээр эвдэрч сүйдсэн, айлуудын бохир хальж иргэдийн эрүүл, аюулгүй амьдрах нөхцөлд сөргөөр нөлөөлсөн зэрэг аюул тохиож байсан юм.
Ханбогд сумын үерийн далангийн зураг төсөв
Ханбогд сумын төвийн газарзүйн байршил нь нам доор байрлалтай ба баруун болон урд талаараа Галбын уулархаг бүстэй залгаж уулнаас буух томоохон голуудын дунд оршдог өвөрмөц тогтоцтой. Сумын төвийн газар зохион байгуулалт, хот төлөвлөлт тэлснээр шинэ олгогдож буй суурьшлын бүс нь үерийн нөлөөлөлд өртөж бороо хур элбэг жилүүдэд үер усны аюулд өртөх өндөр эрсдэлтэй юм. 2015 оны 6-р сарын 7-ны өдөр дуу цахилгаантай аадар бороо 30 минут орох төдийд сумын төв бүхэлдээ усанд автаж төрийн болон иргэдийн өмч хөрөнгө ихээр эвдэрч сүйдсэн, айлуудын бохир хальж иргэдийн эрүүл, аюулгүй амьдрах нөхцөлд сөрөг нөлөө үзүүлсэн ноцтой аюул болж байсан юм.
Ханбогд сумын дулаан хангамж
Ханбогд сумын хөгжлийн ерөнхий төлөвлөгөөний дагуу сумын хойд дэнжид баригдсан ЗДТГ-ын барилга, соёлын төв, нийгмийн даатгал, цэцэрлэгийн барилга, 5 давхар орон сууцны барилга, иргэдийн хөгжлийн төв зэрэг сүүлийн жилүүдэд нэмэгдэж баригдсан нийт 9 томоохон барилга хуучин уурын зуухны тогооны хүчин чадал хүрэлцдэггүйгээс төвлөрсөн дулаан системд холбогдоогүй. Тус суманд барилгууд бие даасан халаалтын системтэй байгаа нь агаарын бохирдол үүсгэх, цахилгаанаар шийдсэн тохиолдолд хэт өндөр ашиглалтын зардал гарч байна.
