ТӨСЛИЙН ҮНДЭСЛЭЛ:

Ханбогд сум нь суурин болон хөдөлгөөнт хүн амын төвлөрөл ихтэй томоохон сум бөгөөд 2021 оны статистикийн судалгаагаар тус суманд албан ёсны бүртгэлтэй 8154 хүн ам, 1718 өрх
тоологдсон. Энэхүү томоохон суурин болон хөгжиж байгаа сумын хувьд иргэдийн эрүүл, аюулгүй орчинд тав тухтай амьдарч, ажиллах орчин, нөхцөлийг бүрдүүлэхэд нэн тэргүүнд сумын  төвийн инженерийн шугам сүлжээг өргөтгөж гэр хорооллын айл өрхийг төвлөрсөн шугам сүлжээнд холбох нь чухал дэмжлэг болох юм. 2017 онд Ханбогд сумын төвд “Оюу толгой” компанийн санхүүжилтээр “Цэвэр усан хангамжийн цогцолбор”-ыг байгуулсан. Тус цогцолбор гүний хоёр худаг, усан сан, ус цэвэршүүлэх байгууламж, ил өртөө, усны чанарын хяналтын лаборатори зэрэг байгууламжуудаас бүрдсэн, автомат технологитой, иж бүрэн цогцолбор юм. Мөн 2016 онд Азийн хөгжлийн банкны G0204-MON төслийн санхүүжилтээр Ханбогд сумын төвд цэвэрлэх байгууламж, цэвэр, бохир, дулааны гол шугамууд ашиглалтад орсон. Дээрх томоохон хөрөнгө оруулалтуудын үр дүнд Ханбогд сумын хэрэглэгчид цэвэр, бохир усны төвлөрсөн шугам сүлжээнд анх холбогдож эхэлсэн бөгөөд үүнээс хойш сумын орон нутгийн хөрөнгө оруулалтаар цэвэр, бохир, дулааны салбар шугамуудыг өргөтгөж 2021 оны байдлаар сумын төвийн одоо суурьшсан нийт хэрэглэгчдийн зөвхөн 30 орчим хувь нь дээрх шугамуудад холбогдсон байна. Иймд дээрх стандартад нийцсэн зураг, төсвийн дагуу баригдсан, хүчин чадал сайтай цэвэр, бохир усны гол шугамд гэр хорооллын айл өрх холбох салбар шугамуудыг өргөтгөх нь нэн чухал байсан.

ТӨСЛИЙН ЗОРИЛГО:

Ханбогд сумын төвийн айл өрх, албан байгууллагыг цэвэр, бохир усны төвлөрсөн шугам сүлжээнд холбож тэдгээр суурьшлын бүсийн ард иргэдийг эрүүл, ая тухтай амьдрах орчин нөхцөлийг бүрдүүлэх.

ТӨСЛИЙН ХЭРЭГЖИЛТ:

• “Говийн оюу хөгжлийг дэмжих сан”-ийн Удирдах зөвлөлийн 2022 оны № 02, № 10 тогтоолуудаар “Ханбогд сумын төвийн гадна цэвэр, бохир усны шугамын угсралт” төслийг 4,456,004,019 төгрөгөөр санхүүжүүлэхээр батлав.
• Захиалагч аймгийн ЗДТГ гүйцэтгэгчийг сонгон шалгаруулж гэрээ байгуулсны дагуу захиалагч Өмнөговь аймгийн ЗДТГ, гүйцэтгэгч “Шүтээн-Эрдэнэ” ХХК, санхүүжүүлэгч "Говийн Оюу хөгжлийг дэмжих сан” санхүүжилтийн гуравласан гэрээг байгуулснаар барилга угсралтын ажлыг эхлүүлэв.
• 2022 онд “Шүтээн-Эрдэнэ” ХХК нь орон нутгийн зах зээлээс 491.2 сая төгрөгийн бараа бүтээгдэхүүн, шатахуун худалдан авч, 30 түр ажлын байр бий болгосон.
• Улсын комисс 2022 оны 12 дугаар сарын 08-нд ажиллаж ашиглалтад шилжүүлэв.

ҮР ДҮН:

• Ханбогд сумын төвийн Гоёот, Хөөвөр, Бага булаг хорооллын 30 аж ахуйн нэгж байгууллага, 325 айл өрх, 30 гудамж цэвэр бохир усны төвлөрсөн шугамд холбогдоно.
• Иргэдийн ундны усны чанар сайжирсан.
• Иргэдийн ая тухтай, эрүүл, аюулгүй орчинд амьдарч, ажиллах нөхцөл сайжирсан.
• Хөрсний бохирдлыг бууруулсан.
• Айл өрх, албан байгууллагын санхүүгийн чадавхад эерэг нөлөөлнө.
• Шугам сүлжээний үйл ажиллагааг хариуцагч байгууллагын борлуулалтын орлого нэмэгдэнэ.