ТӨСЛИЙН ҮНДЭСЛЭЛ:

Ханбогд сум нь суурин болон хөдөлгөөнт хүн амын төвлөрөл ихтэй томоохон сум бөгөөд 2023 оны статистикийн судалгаагаар тус суманд албан ёсны бүртгэлтэй 7986 хүн ам, 2193 өрх тоологдсон. Энэхүү томоохон суурин болон хөгжиж байгаа сумын хувьд иргэдийн эрүүл, аюулгүй орчинд тав тухтай амьдарч, ажиллах орчин, нөхцөлийг бүрдүүлэхэд нэн тэргүүнд сумын төвийн инженерийн шугам сүлжээг өргөтгөж гэр хорооллын айл өрхийг төвлөрсөн шугам сүлжээнд холбох нь чухал дэмжлэг болох юм. "Говийн оюу хөгжлийг дэмжих сан”-ийн санхүүжилтээр 2022 онд тус сумын Гоёот, Хөөвөр, Бага булаг хорооллын 30 аж ахуйн нэгж байгууллага, 325 айл өрх, 30 гудамж цэвэр бохир усны төвлөрсөн шугамд холбох 18,5 км шугамын ажил хийгдэж ашиглалтад шилжүүлсэн. Дээрх төслийн хүрээнд 50 гаруй айл өрх, албан байгууллагыг цэвэр, бохир усны төвлөрсөн шугамд холбогдсон бөгөөд томоохон суурин  олон хөгжиж буй тус сумын хувьд салбар шугамын өргөтгөлийг үргэлжлүүлэх, илүү олон хэрэглэгчийг төвлөрсөн шугамд холбох хэрэгцээ, шаардлага өндөр байна.

ТӨСЛИЙН ЗОРИЛГО:

• Ханбогд сумын төвийн айл өрх, албан байгууллагыг цэвэр, бохир усны төвлөрсөн шугам сүлжээнд холбож тэдгээр суурьшлын бүсийн ард иргэдийг эрүүл, ая тухтай амьдрах орчин нөхцөлийг бүрдүүлэх.

ТӨСЛИЙН ХЭРЭГЖИЛТ:

• “Говийн оюу хөгжлийг дэмжих сан”-ийн Удирдах зөвлөлийн 2023 оны № 03 тогтоолоор “Ханбогд цэвэр бохирын шугам - 2023” төслийг 5,300,579,475 төгрөгөөр  санхүүжүүлэхээр батлав.
• Захиалагч аймгийн ЗДТГ гүйцэтгэгчийг сонгон шалгаруулж гэрээ байгуулсны дагуу захиалагч Өмнөговь аймгийн ЗДТГ, гүйцэтгэгч “Сан” ХХК, санхүүжүүлэгч “Говийн оюу хөгжлийг дэмжих сан” санхүүжилтийн гуравласан гэрээг байгуулснаар барилга угсралтын ажлыг эхлүүлэв.
• Төслийн ажлыг 2024 он 05 сард улсын комисст хүлээлгэж өгсөн.

ҮР ДҮН:

• Шар дов, Баян хөөвөр хорооллын 31 аж ахуйн нэгж байгууллага, 516 айл өрх, 23 гудамжийг цэвэр, бохир усны төвлөрсөн шугам сүлжээнд холбогдох боломжтой болно.
• Иргэдийн ундны усны чанар сайжирна.
• Иргэдийн ая тухтай, эрүүл, аюулгүй орчинд амьдарч, ажиллах нөхцөл сайжирна.
• Хөрсний бохирдлыг бууруулна.
• Айл өрх, албан байгууллагын санхүүгийн чадавхад эерэг нөлөөлнө.
• Шугам сүлжээний үйл ажиллагааг хариуцагч байгууллагын борлуулалтын орлого нэмэгдэнэ.