ТӨСЛИЙН ҮНДЭСЛЭЛ:
      “Тэтгэмж, мөнгөн тусламжийн хэмжээг тогтоох тухай“ Улсын их хурлын 2006 оны 47 дугаар тогтоол, “Хөтөлбөр хэрэгжүүлэх тухай” Засгийн газрын 2006 оны 194 дүгээр тогтоолын дагуу ерөнхий боловсролын сургуулийн “Үдийн цай” хөтөлбөр 2006 оноос хэрэгжиж эхэлсэн. 2019 онд УИХ-аас “Үдийн цай” хөтөлбөрийг албан ёсоор “Үдийн хоол” болгож 1-5 дугаар ангийн нэг хүүхдэд ноогдох зардал 900 төгрөг байсныг 1500 болгон нэмсэн. Мөн 6-9 дүгээр ангийн үдийн хоолны зардлыг 2022 оны 9 сарын 1-ээс, 10-12 дугаар ангийн хүүхдийн хоолны зардлыг 2023 оноос нэмэхээр болсон. “Ерөнхий боловсролын сургуулийн хоол үйлдвэрлэл, үйлчилгээний тухай” хуулийн 2 дугаар зүйлд “Сургуулийн хоол үйлдвэрлэл, үйлчилгээний стандартын шаардлага хангасан зориулалтын байр, гал тогоо, тоног төхөөрөмж, мэргэжлийн хүний нөөцтэйгөөр явуулна” гэж заасан.

      Үдийн цай” хөтөлбөр хэрэгжилтийн үед гэрээт байгууллагын нийлүүлсэн бэлэн бүтээгдэхүүнийг сурагчдад олгодог байсан бол “Үдийн хоол” хөтөлбөрийн хүрээнд сурагчдын үдийн хоолыг сургуулийн гал тогоонд бэлтгэсэн шинэхэн хоолоор сурагчдад үйлчлэх юм. Манлай сумын ерөнхий боловсролын сургуулийн дотуур байранд сурагчдын хоол бэлтгэлийн гал тогоо байгаа боловч хуулийн дагуу сургууль өөрийн байрандаа стандартын шаардлага хангасан хоол үйлдвэрлэх тоног төхөөрөмж, хэрэгсэл байхгүй учраас үдийн хоол хөтөлбөрийн хэрэгжилтийг хангахад бэрхшээл тулгарч байгаа юм. Тиймээс сургуулийн гал тогооны өрөөнд зориулалтын тоног төхөөрөмж нийлүүлэх шаардлагатай байна. Манлай сумын ЕБС-д 6-12 насны 234 хүүхэд суралцдаг.
 

ТӨСЛИЙН ЗОРИЛГО:
     Сургуулийн гал тогоонд шаардлагатай тоног төхөөрөмжийг нийлүүлэн, стандартын шаардлага хангасан илчлэг, шим тэжээл бүхий шинэхэн хоол үйлдвэрлэн сурагчдыг хангах.
 

ТӨСЛИЙН ХҮРЭЭНД ХИЙГДСЭН АЖИЛ:
      Манлай сумын цэцэрлэгт ерөнхий боловсролын сургуулийн гал тогооны өрөөнд хоол үйлдвэрлэлийн зориулалт бүхий 16 нэр төрлийн 122 ширхэг тоног төхөөрөмж, гал тогооны хэрэгслийг нийлүүлэн суурилуулсан.
 

ТӨСЛИЙН ҮР ДҮН:

• Сургуулийн сурагчид үдийн хоол хөтөлбөрт хамрагдах боломжтой болсон
• Сурагчид эрүүл, аюулгүй, тэжээллэг хоол хүнсээр тэгш, хүртээмжтэй хангагдаж байна.
• Орон нутгийн бизнес эрхлэгчдийн хүнсний түүхий эдийн ханган нийлүүлэлт нэмэгдэнэ.
• Ахлах тогооч, бэлтгэгч гэсэн 2 ажлын байр шинээр бий болсон.