ТӨСЛИЙН ҮНДЭСЛЭЛ:
      Манлай сумын эрүүл мэндийн төв нь 1938 онд байгуулагдсан бөгөөд одоогоор 21 ажилтантайгаар эрүүл мэндийн тусламж үйлчилгээг Манлай сумын болон явуулын иргэдэд үзүүлж байна. Эрүүл мэндийн үйлчилгээг ард иргэдэд үзүүлэхэд эмнэлгийн үйл ажиллагаатай холбоотой тариур, зүү, лабораторийн халдвартай хог хаягдал, цус цусан бүтээгдэхүүн гэх мэт халдвартай хог хаягдал ихээр үүсдэг. Ковид-19 цар тахалтай холбоотойгоор 2021 оны 4 сард гэхэд 146.8кг эмнэлгийн хог хаягдал гарсан байна. Эрүүл мэндийн сайдын 2017.12.12-ны А/505 тоот тушаалын дагуу хог хаягдлыг цуглуулж түр хадгалах цэгт хадгалах, түр хадгалах цэгт хог хаягдлын ариутгалын автоклаваар ариутгаж, эмнэлгийн хог хаягдлыг устгах цэгт ландфиллын аргаар булшилж устгах заавар журамтай боловч одоогийн байдлаар хог хаягдлыг түр хадгалах байр нь шаардлага хангахгүй, ариутгалын автоклав байрлуулах боломжгүй зэргээс шалтгаалан эмнэлгийн хог хаягдлыг шатааж устгаж байна. Мөн ландфиллын аргаар устгах хогийн нүх байгаа боловч газрын эвдрэл нуралтаас шалтгаалан аюултай хог хаягдлын стандартыг хангахгүй болж нохой, хүн чөлөөтэй нэвтэрч халдвар тараах эрсдэл үүсээд байна.
 

ТӨСЛИЙН ЗОРИЛГО:
      Эрүүл мэндийн төвөөс үүсдэг эмнэлгийн халдвартай хог хаягдлыг заавар стандартын дагуу цуглуулж, хадгалж, ариутгаж устгаж хэвших бөгөөд энэ нь халдвартай хог хаягдлыг зааврын дагуу бус устгаснаас болж эрүүл мэндийн ажилтныг халдварт өртөх эрсдэлийг бууруулах, байгаль орчин болон сумын иргэдийн эрүүл мэндэд сөргөөр нөлөөлөх эрсдэлийг арилгах зорилготой. Зориулалтын байртай болж халдвартай хог хаягдлуудыг бүрэн халдваргүйжүүлсний дараа хогийн цэгт тээвэрлэж устгах тул ЭМТ-ийн ажилтнууд халдвартай хог хаягдалтай харьцах үед халдвар авах эрсдэлийг бууруулна.

ТӨСЛИЙН ХҮРЭЭНД ХИЙГДСЭН АЖИЛ:
      Манлай сумын Эрүүл мэндийн төвд эмнэлгийн халдвартай, аюултай хог хаягдал ариутгах 5.3*2.4м хэмжээ бүхий зөөврийн байрыг нийлүүлсэн. Улмаар хог хаягдлыг ариутгах автоклав төхөөрөмжийг байрлуулсан.
 

ТӨСЛИЙН ҮР ДҮН:

• Эмнэлгийн халдвартай хог хаягдлыг цуглуулж хадгалах зориулалтын байртай болсон.
• Халдвартай хог хаягдлыг ариутгаж хэвшсэн
• Эмнэлгийн ажилтнууд халдвартай хог хаягдалтай харьцах үед халдвар авах эрсдэл буурсан.
• Хог хаягдлыг зориулалтын дагуу устгаж хэвшсэн.