ХӨТӨЛБӨРИЙН ҮНДЭСЛЭЛ:
Хүрмэн сумын эрүүл мэндийн төв нь 1938 онд байгуулсагдсан ба нийт 18 ажиллагсадтайгаар үйл ажиллагаагаа явуулж байна. Сумын нийт хүн амд эрүүл мэндийн болон эмнэлгийн тусламж үйлчилгээ, лабораторийн тусламж үйлчилгээг түргэн шуурхай, найдвартай хүргэж ажиллах зорилготойгоор үйл ажиллагаа явуулдаг ба жилд дунджаар давхардсан тоогоор 5300 иргэнд үйлчилгээ үзүүлдэг. Эрүүл мэндийн лабораторийн тусламж үйлчилгээ эрүүл мэндийн системийн нэн чухал бүрэлдэхүүн хэсэг юм. Өвчлөлийн хяналт оношилгоо, урьдчилан сэргийлэлт, эмчилгээ болон эрүүл мэндэд чиглэсэн бүхий л үйл ажиллагааны үр дүн болон үр ашиг нь тэдгээрт чиглэсэн лабораторийн найдвартай тусламж үйлчилгээнээс хамаардаг.
Засгийн газраас хэрэгжүүлж байгаа Элэг бүтэн Монгол, Элэг бүтэн Өмнөговь хөтөлбөр хэрэгжиж үзлэг шинжилгээнд хамрагдсан иргэдийн шинжилгээний хариуг цахимаар тайлагнах, хариуг хэвлэж олгох зэрэг ажлыг хийж байна. Суманд жилдээ дунджаар 991 иргэн шээсний ерөнхий болон бусад шинжилгээнд хамрагдаж байна. Гематологийн анализатор байхгүй улмаас зөвхөн цусны ерөнхий шинжилгээ өгөхийн тулд 2 дугаар шатлалын эмнэлэг рүү явж цаг алдах, аймгийн төв орж шинжилгээ өгч ирэх зэргээр эдийн засагт хүндрэл учирч байна.
ХӨТӨЛБӨРИЙН ЗОРИЛГО:
Эрүүл мэндийн төвийг лабораторийн тоног төхөөрөмжөөр хангаснаар иргэдэд үзүүлж байгаа оношилгоо, шинжилгээний чанар сайжирч Элэг бүтэн Монгол, Элэг бүтэн Өмнөговь хөтөлбөр, эрүүл мэндийн анхан шатны тусламж үйлчилгээнд мобайл технологийн хэрэглээг нэмэгдүүлэх, иргэдэд үзүүлэх тусламж үйлчилгээний хүртээмж нэмэгдэнэ.
ХӨТӨЛБӨРИЙН ХҮРЭЭНД ХИЙГДСЭН АЖИЛ:
Хүрмэн сумын эрүүл мэндийн төвд цусны гематологийн анализатор, түүнд ашиглах урвалж эм бодисыг нийлүүлж, суурилуулж өгсөн. Уг төхөөрөмж нь цагт 60 тестийг шинжлэх хүчин чадалтай юм.
ХӨТӨЛБӨРИЙН ҮР ДҮН:
- Сум орон нутагтаа цусны дэлгэрэнгүй шинжилгээг авдаг болсон.
- Сумын хэмжээнд шинжилгээнд хамрагдаж буй иргэдийн тоо нэмэгдсэн.
- Элэг бүтэн Өмнөговь хөтөлбөрийн хамрагдалт өссөн.
- Мобайл технологийн тусламж үйлчилгээнд хамруулсан иргэдийн тоо нэмэгдсэн.