ТӨСЛИЙН ҮНДЭСЛЭЛ:

Манлай сумын 15-р цэцэрлэг нь 2013 онд ашиглалтанд орсон 100 хүүхдийн хүчин чадалтай цэцэрлэгийн барилгатай. 2018-2019 оны хичээлийн жилд 8 багш, 6 ажилтантайгаар 130 хүүхэд хамруулан ажилласан байна. Гэвч энэ нь цэцэрлэгийн барилгын хүчин чадлаас хамаарч тойргийн хэмжээнд байгаа 267 хүүхдийн 50% ийг л цэцэрлэгт хамруулсан тоон үзүүлэлт юм.

ТӨСЛИЙН ЗОРИЛГО:

Манлай сумын цэцэрлэгт хамрагдаагүй хүүхдүүд цэцэрлэгт хамрагдаж сургуулийн өмнөх боловсрол эзэмших бололцоотой болно. Мөн тооны эцэг эх, асран хамгаалагч нар үр хүүхэддээ санаа зовох зүйлгүй ажил эрхэлж орлого олж ахуй амьдралаа дээшлүүлэх бололцоо бүрдэнэ.

ТӨСЛИЙН ХҮРЭЭНД ХИЙГДЭХ АЖИЛ:

• Манлай сумын 15-р цэцэрлэгийн барилгатай өргөтгөл байдлаар хүзүүвчээр холбогдох 100 хүүхдийн хүчин чадалтай цэцэрлэгийн 2 давхар барилгыг батлагдсан зураг төсвийн дагуу барьж улсын комисст хүлээлгэн өгч ашиглалтанд оруулах.
•  Манлай сумын 100 хүүхэд хүлээн авах хүчин чадалтай 15 дугаар шинэ цэцэрлэгт 153 нэр төрлийн 2054 ширхэг тоног төхөөрөмж, тавилга, хэрэгсэл нийлүүлнэ.

ТӨСЛИЙН ХЭРЭГЖИЛТ:

•  “Говийн оюу хөгжлийг дэмжих сан”-ийн Удирдах зөвлөлийн 2019 оны 02-р тогтоолоор Манлай сумын 15-р цэцэрлэгийн дэргэдэх 100 хүүхдийн цэцэрлэгийн барилга барих төслийг санхүүжүүлэхээр батлав.
•  Говийн оюу хөгжлийг дэмжих сан нь захиалагч аймгийн ЗДТГ болон захиалагчийн шалгаруулсан барилгын гүйцэтгэгч “Вентана констракшин” компанитай санхүүжилтийн гэрээ байгуулснаар барилга угсралтын ажил эхлүүлэв.
•  “Говийн оюу хөгжлийг дэмжих сан”-ийн Удирдах зөвлөлийн 2019 оны 07-р тогтоолоор “Манлай сумын цэцэрлэгийн тоног төхөөрөмж” хөтөлбөрийг санхүүжүүлэхээр батлав.
• “Говийн оюу хөгжлийг дэмжих сан” нь захиалагч аймгийн ЗДТГ болон захиалагчийн шалгаруулсан тоног төхөөрөмж нийлүүлэх гүйцэтгэгч “Элбэг туулай” компанитай санхүүжилтийн гэрээ байгуулснаар тоног төхөөрөмж нийлүүлэх хөтөлбөрийн ажил эхлүүлэв.
• 2019 оны 12 сарын 19 ны өдөр шинэхэн цэцэрлэгийн нээлтийн ёслолын үйл ажиллагаа болж Өмнөговь аймгийн ИТХ-ын дарга Х.Сугир, “Оюутолгой” ХХК-ийн үйл ажиллагаа хариуцсан захирал бөгөөд “Говийн оюу хөгжлийг дэмжих сан”-ийн Удирдах зөвлөлийн дарга Тим Экерсли, Орон нутгийн харилцааны Ерөнхий менежер Г.Сугар, Манлай  сумын удирдлагууд, тус цэцэрлэгийн багш сурган хүмүүжүүлэгчид, эцэг эхчүүд оролцож цэцэрлэгийн авьяаслаг бяцхан багачууд ая дууныхаа дээжээр шинэхэн цэцэрлэгээ мялаав.

ТӨСЛИЙН ҮР ӨГӨӨЖ:

• Зориулалтын хоолны болон урлаг, биеийн тамирын заалтай стандарт хангасан байранд сургуулийн өмнөх боловсрол олгох үйл ажиллагаа явуулах хэвийн нөхцөл бүрдүүлсэн
• Сургалтын өмнөх боловсрол олгох үйлчилгээ явуулахад шаардлагатай тавилга, тоног төхөөрөмжөөр иж бүрэн хангагдаж хүүхдүүдэд ая тухтай орчинд сурч боловсрох боломжтой болсон
• Хамран сургах тойргийн хүүхдүүд сургуулийн өмнөх боловсрол эзэмших нөхцөл бүрдсэн
• Шинээр арав гаруй ажлын байр бий болсон.
• Өмнөговь аймгийн Манлай сумын 130 гаруй хүүхэд цэцэрлэгт хамрагдаж, эцэг эхчүүд хүүхдэдээ санаа зовохгүйгээр ажил хөдөлмөр эрхлэх, ахуй амьдралаа дээшлүүлэх боломж бүрдэв.