ХӨТӨЛБӨРИЙН ҮНДЭСЛЭЛ:
      Монголчууд бид эрдэмтэн мэргэд, алдартай уран дархчуудынхаа ур ухаан хөдөлмөр шингэсэн гар урлалын бүтээлүүдийг олон зууны туршид ахуй амьдралдаа хэрэглэж ирсэн ард түмэн билээ. Ханбогд суманд үе дамжсан уран дархчууд, сийлбэрч, үйлчин, барималч зэрэг уран гартан олонтой байсан бөгөөд тэдний ур ухаанаар бүтээгдсэн ахуй болоод гоёл чимэглэлийн эдлэлүүд соёлын үнэт дурсгал болон үлджээ. Гэтэл сүүлийн үед ялангуяа 1990-ээд оноос хойш нутгийн ийм сайхан уламжлал ур хийц цөөрч биет болоод биет бус соёл өв залгамжлал тасарч мартагдаж бүдгэрсээр байгаа тул уг төслийг санаачлан хэрэгжүүлэх болсон.
 

ХӨТӨЛБӨРИЙН ЗОРИЛГО:
      Монголын уран дархдын мартагдах дөхсөн өв уламжлал, биет бус өв соёлыг судлах орон нутгийн хэмжээнд залуу хойч үеийнхэнд зааж сургах, өвлүүлэн үлдээх өв соёлыг бүтээгч залуу үеийг бий болгоход оршино.
 

ХӨТӨЛБӨРИЙН ХҮРЭЭНД ХИЙГДЭЖ БУЙ АЖИЛ:
   Ханбогд суманд Насан туршийн боловсролын төвийн харьяалалтай гар урлалын төвийг байгуулан сургалтын хэрэглэгдэхүүн, техник хэрэгсэл, тоног төхөөрөмжөөр хангаж, хөтөлбөрт хамрагдах хүсэлт гаргасан иргэдэд 10 сарын хугацаатай үргэлжлэх модон эдлэл, сийлбэр, алт мөнгөний дархан, зээгт наамал зэрэг чиглэлээр ажлын байран дээрх сургалтанд хамруулах, Ханбогд сумын соёлын өв тээгч уран гартнуудын уран бүтээлийг судлах, тэдгээрийн хийц, аргачлалыг хойч үеийн залууст өвлүүлэх, түгээн дэлгэрүүлэх, хөтөлбөрийн хүрээнд хийсэн ажлаар үзэсгэлэн, ном, CD гаргах ажлууд хийгдэж байна.
 

ХӨТӨЛБӨРИЙН ҮР ӨГӨӨЖ:
     Ханбогд суманд техник хэрэгсэл, багаж, тоног төхөөрөмжөөр хангагдсан төвтэй болж гар урлал хийж худалдах замаар өрхийн орлогоо нэмэгдүүлэх сонирхолтой иргэд ажлын байран дээр сурч дадлагажих, сумын соёлын өвийг тээгч уран гартнуудын уран бүтээлийн хийц, аргачлалыг хойч үеийн залууст өвлүүлэх, түгээн дэлгэрүүлэх зэрэг нөлөөтэй.
 

ХӨТӨЛБӨРИЙН ХЭРЭГЖИЛТ, ҮР ДҮН:

• Говийн оюу хөгжлийг дэмжих сангийн Удирдах зөвлөлийн 2019 нэгдүгээр сарын 24-ний өдрийн хурлын 3 тоот тогтоолоор батлагдсан Зорилтот сумдад жил бүр олгох санхүүжилтийн квотын хүрээнд “Өнө мөнхөд өөдлөн дэвжих өв соёл мину” хөтөлбөрийг хэрэгжүүлж байна.
• Ханбогд сумын ЗДТГ нь “Говийн оюу хөгжлийг дэмжих сан”-гийн “Төсөл, хөтөлбөр санхүүжүүлэх удирдамж”, “Говийн оюу хөгжлийг дэмжих санд ирүүлсэн саналыг хянан үзэх, үнэлэх, шийдвэр гаргах проткол”-д нийцүүлэн эрэмбэлэх, сонгон шалгаруулах ажлын хэсгүүдийн шийдвэрээр төслийг сонгон шалгаруулсан
• “Говийн оюу хөгжлийг дэмжих сан” нь захиалагч Ханбогд сумын ЗДТГ болон хөтөлбөрийн хэрэгжүүлэгч иргэн Д.Ганбаттай санхүүжилтийн гэрээ байгуулсан
• Хэрэгжүүлэгч иргэн Д.Ганбат хөтөлбөрийн гэрээний ажлыг хугацаанд нь чанартай хэрэгжүүлснээр Өмнөговь аймгийн Ханбогд сумын гар урлалын бүтээл хийх сонирхолтой иргэд ажлын байран дээр сурч дадлагажих, өрхийн орлогоо нэмэгдүүлэх, сумын соёлын өвийг тээгч уран гартнуудын уран бүтээлийн хийц, аргачлалыг хойч үеийн залууст өвлүүлэх, түгээн дэлгэрүүлэх эерэг үзүүлэлтүүд бий болох юм.