ХӨТӨЛБӨРИЙН ҮНДЭСЛЭЛ:
      Манай суманд төвлөрсөн хогийн цэгтэй болоод нэлээдгүй хугацаа өнгөрч байгаа ч иргэд, албан газрууд хогоо ангилан ялгах соёлд суралцахгүй байгаа нь хогийг ангилах зориулалтын сав байдаггүйтэй холбоотой. Энэ байдлын улмаас хог бутарч салхинд хийсч хөрс, байгаль орчныг бохирдуулан иргэдийн эрүүл мэндэд сөргөөр нөлөөлөх, сумын өнгө үзэмжийг муутгах зэрэг олон сөрөг үр дагавартай. Мөн дахин ашиглах боломжтой хог хаягдлын төвлөрүүлэх, эмнэлэг болон банкны бичиг баримт зэрэг нууцлалын зэрэглэлтэй хог хаягдлыг шатаах, тариур зэрэг аюултай хог хаягдлыг булшлах, ахуйн хог хаягдлыг хийсч бутрахаас сэргийлсэн зориулалтын саванд төвлөрүүлэх зэрэг орчин цагийн төвлөрсөн суурин газрын хог хаягдлыг зохистой ашиглах, зөөвөрлөх, хадгалах зэрэг технологийг нэвтрүүлж, иргэдэд соёлтой хэрэглээний боловсролыг эзэмшүүлэх нэн шаардлагатай болсон нь энэхүү хөтөлбөрийг хэрэгжүүлэх үндэслэл болсон.
 

ХӨТӨЛБӨРИЙН ЗОРИЛГО:
      Манлай сумын төвийн 6 байгууллага иргэдэд төрийн үйлчилгээг хүргэдэг ба эдгээр байгууллагад хог төвлөрүүлэх, ангилан ялгах зориулалтын сав байдаггүй. Хөтөлбөр хэрэгжсэнээр төрийн байгууллагуудын гадна орчин сайжирч, өнгө үзэмж нэмэгдэнэ. Мөн иргэд ажилчид цэвэр орчинд тав тухтай ажиллаж амьдрах нөхцөлийг бүрдүүлж, хог хаягдлаа байгальд хоргүйгээр устгах боломжтой болно.

ХӨТӨЛБӨРИЙН ХҮРЭЭНД ХИЙГДСЭН АЖИЛ:
      Манлай сумын Засаг даргын тамгын газар, хүүхдийн цэцэрлэг, эрүүл мэндийн төв, ерөнхий боловсролын сургууль, соёлын төв, “Манлайн бадрах” ОНӨААТҮГ гэсэн 6 байгууллагын гадна 80смХ80смХ120см хэмжээтэй шатаах зуух, 2мХ1мХ1.2м хэмжээтэй 2 төрлийн хог хаях зориулалт бүхий хогийн савыг хийж байрлуулсан.
 

ХӨТӨЛБӨРИЙН ҮР ДҮН:

• Хувь хүмүүс хог хаягдлаа ангилах соёлд суралцахад үлгэр дуурайл болно.
• Хувийн аж ахуй нэгжүүд үлгэр жишээ авч өөрийн байгууллагад тус туршлагыг нэвтрүүлэх боломжтой.
• Явуулын хүмүүс зорчиход цэвэр цэмцгэр орчин хүлээн авна.
• Сумын тохижилт, өнгө үзэмжид эерэгээр нөлөөлсөн.
• Иргэдийн амьдрах орчин сайжирсан.