ТӨСЛИЙН ҮНДЭСЛЭЛ:

Хүн амын тоо нэмэгдэхийн хэрээр өсөн нэмэгдэж буй хог хаягдлын нэг нь хуванцар хог хаягдал юм. Өмнөговь аймгийн Байгаль орчин, аялал жуулчлалын газраас аймгийн хэмжээнд жилдээ ойролцоогоор 200 гаруй тонн энгийн хог хаягдал гардаг үүний 20-30 хувь нь дахин боловсруулах боломжтой хог хаягдал байгаагаас одоогоор нийт хог хаягдлын зөвхөн 8 орчим хувийг дахин боловсруулах үйлдвэрүүдэд нийлүүлж байгаа судалгаа гаргасан байна. Өмнөговь аймгийн ЗДТГ, Өмнөговь аймгийн Байгаль орчин, аялал жуулчлалын газартай хамтран Хог хаягдлын тухай хууль, Аймгийн Засаг даргын 2020-2024 оны үйл ажиллагааны “Нутгийн хишиг” хөтөлбөрийн дагуу хог ангилан ялгах, дахин боловсруулах үйлдвэрийг байгуулахаар төслийг санаачилсан бөгөөд дараах холбогдох ажлуудыг зохион байгуулсан байна. Үүнд:

•  Орон нутгийн төсвийн хөрөнгө оруулалтаар хуванцар дахин боловсруулах үйлдвэрийн тоног төхөөрөмжийг “Хангайн Эрхэс” ХХК, “Хазаарбат” ХХК нар аймгийн ЗДТГ-т нийлүүлсэн.
• Орчин үеийн технологийн шийдлийг ашигласан Хог хаягдал боловсруулах үйлдвэрийн барилгын зураг төсвийг боловсруулах ажлыг “Хязгааргүй шулуун” ХХК гүйцэтгэн аймгийн ЗДТГ-т хүлээлгэн өгсөн.
• Аймгийн иргэдийн Төлөөлөгчдийн Хурлын тогтоолын дагуу “Цэмцгэр Өмнөговь” ОНӨААТҮГ-г байгуулаад байна. Тус газар нь хог дахин боловсруулах үйлдвэрийн үйл ажиллагааг хариуцан ажиллана.

ТӨСЛИЙН ЗОРИЛГО:

Хог хаягдлаас хүний эрүүл мэнд, байгаль орчинд үзүүлэх сөрөг нөлөөллийг бууруулах, түүнээс урьдчилан сэргийлэх, хог хаягдлыг эдийн засгийн эргэлтэд оруулж, ангилах, цуглуулах, дахин ашиглах, дахин боловсруулах.

ТӨСЛИЙН ХЭРЭГЖИЛТ:

• “Хог хаягдлыг дахин боловсруулах үйлдвэрийн барилга” төслийг “Говийн оюу хөгжлийг дэмжих сан”-ийн Удирдах зөвлөлийн 2023 оны 03 дугаар тогтоолоор 1,350,065,000 төгрөгөөр санхүүжүүлэхээр батлав.
• Захиалагч аймгийн ЗДТГ гүйцэтгэгчийг сонгон шалгаруулж гэрээ байгуулсны дагуу захиалагч Өмнөговь аймгийн ЗДТГ, гүйцэтгэгч “Батс-Өргөө” ХХК, санхүүжүүлэгч “Говийн оюу хөгжлийг дэмжих сан” санхүүжилтийн гуравласан гэрээг байгуулснаар төслийг эхлүүлэв.
• 2024 оны жилийн эцсийн байдлаар “Хог хаягдлыг дахин боловсруулах үйлдвэрийн барилга”-ын ажлын гүйцэтгэл 90%-тай байна.

ҮР ДҮН:

• Байгаль орчны бохирдлыг бууруулна.
• Өмнөговь аймгийн бүх сумдаас дахин боловсруулах боломжтой 6 төрлийн хог хаягдлыг цуглуулж байгаль орчинд шууд хаягдах хог хаягдлыг бууруулна.
• Шинээр байгуулагдсан “Цэмцгэр Өмнөговь” ОНӨААТҮГ ажлын байртай болно.
• Шинээр байнгын 5 ажлын бий болж иргэдийн өрхийн орлого нэмэгдэнэ.