ТӨСЛИЙН ҮНДЭСЛЭЛ:

Даланзадгад сумын Дулааны цахилгаан станц нь 444 аж ахуйн нэгж байгууллага, 69 төсөвт байгууллага, 2705 айл өрх буюу нийт 3218 хэрэглэгчийг дулааны эрчим хүчээр ханган ажилладаг. Мөн тус станц нь 2000 онд ашиглалтад орсон бөгөөд жилд дунджаар 70,000 тн нүүрс түлж 18,000 тн үнс ялгаруулдаг. Тус станц нь үнс, шаарга зайлуулах тоног төхөөрөмжгүйгээс үнс, нурам зайлуулагч 3 хүнээр үнсээ хуурайгаар нь түрдэг тэргээр зөөлгөн машинд ачин станцаас урагш 3.5 км газарт тээвэрлэн хаядаг. Зуухны хий соролт норм хэмжээнээс 3-4 дахин ихсэж горим алдагдсанаас АҮК 50%-иас доош буурч дутуу шаталтууд байх ёстой хэмжээнээс 2-3 дахин өссөн. Үүнээс шалтгаалан нүүрсний зарцуулалт нэмэгдсэн. мөн станцын зуухнуудын нүүрсний шаталтаас үүссэн үнсний 93% нь үнс баригчид баригдан бункер уруу хаягддаг технологитой боловч зуухны эд ангиуд хуучирч муудсанаас зөвхөн 40% нь үнс баригчид баригдан, 20% нь утааны хийтэй хамт тээвэрлэгдэн яндангаар агаар мандалд хаягддаг. Иймд тус станцаас гарч байгаа үнснээс шалтгаалсан агаарын бохирдлыг бууруулах нь нэн тэргүүний тулгамдсан асуудал болсон байна.

ТӨСЛИЙН ЗОРИЛГО:

Станцад усаар үнс зайлуулах систем болон үнсэн сан байгуулж хотын агаар орчны бохирдлыг бууруулж оршин суугчдад таатай нөхцөл бүрдүүлэх, станцын ажилчдын ажиллах орчин нөхцөлийг сайжруулах.

ТӨСЛИЙН ХЭРЭГЖИЛТ:

• “Говийн оюу хөгжлийг дэмжих сан”-ийн Удирдах зөвлөлийн 2022 оны 11 дүгээр сарын 16- ны өдрийн 12 дугаар тогтоолоор “Даланзадгад сумын Дулааны цахилгаан станцад усаар үнс зайлуулах систем болон үнсэн сан байгуулах” төслийг 1,500,000,000 /нэг тэрбум таван зуун сая/ төгрөгөөр санхүүжүүлэхээр батлав.
• Захиалагч аймгийн ЗДТГ “Даланзадгад сумын Дулааны цахилгаан станцад усаар үнс зайлуулах систем болон үнсэн сан байгуулах” ажлын гүйцэтгэгч сонгон шалгаруулж гэрээ байгуулсны дагуу захиалагч Өмнөговь аймгийн ЗДТГ, гүйцэтгэгч “Шүтээн-Эрдэнэ” ХХК, санхүүжүүлэгч “Говийн Оюу хөгжлийг дэмжих сан” хооронд санхүүжилтийн гуравласан гэрээг байгуулснаар төслийн ажлыг эхлүүлэв.
• Төслийн хүрээнд гүйцэтгэсэн ажлыг 2023 оны 12 сарын 19-нд барилга ашиглалтад оруулах комисст хүлээлгэж өгсөн.

ҮР ДҮН:

• Даланзадгад сумын агаар орчны бохирдол буурч оршин суугчдын эрүүл амьдрах таатай нөхцөл бүрдэнэ.
• Станцын ажилчдын хөдөлмөр эрхлэлтийг хөнгөвчилж ажлын байрны эрүүл ахуй, орчны нөхцөл сайжирна.
• Тоноглолуудын үнс тоосонцроос шалтгаалж гэмтэж доголдол үүсдэг байдал багасна.