ХӨТӨЛБӨРИЙН ҮНДЭСЛЭЛ:
      Өмнөговь аймгийн Ханбогд сумын Сум дундын 50 ортой эмнэлэг нь 2015 онд ашиглалтанд орсон. Тус эмнэлэг нь сумын албан ёсны бүртгэлтэй 7437 хүн, хөдөлгөөнт 20000 гаруй хүн амд эмнэлгийн тусламж, үйлчилгээ үзүүлдэг. Үүнээс гадна зарим тохиолдолд Манлай, Баян-Овоо мөн Дорноговь аймгийн Хатанбулаг, Мандах зэрэг сумдын иргэдэд үйлчилж байна. Хүн амын нягтаршилт ихсэхийн хэрээр иргэдийн өвчлөл нэмэгдэх, нүүрсний зам, хилийн боомт, нүүрс тээвэрлэлтийн гол дамжин өнгөрөх цэг Цагаан хад баг зэрэг газруудаар машины аваар осол их гарч байна. Рентгений зураг авах яаралтай тохиолдолд Оюу толгой SOS эмнэлэгт ханддаг.

      2017 онд эмнэлгийн рентгений өрөөг зоорийн давхартаа шийдэж орон нутгийн төсвийн хөрөнгө оруулалтаар өрөөний засвар үйлчилгээг бүрэн хийж дуусгасан ба 2019 онд шинэ технологийн рентген аппаратыг суурилуулсан. Дээрх рентген аппаратны хэвийн ажиллах орчин нөхцөлийг хангах, хүчин чадалд нь тохирсон тог баригч суурилуулах шаардлагатай байсан.
 

ХӨТӨЛБӨРИЙН ЗОРИЛГО:
     Эмнэлгийн тусламж үйлчилгээний чанар, хүртээмж, найдвартай байдлыг сайжруулах
 

ХӨТӨЛБӨРИЙН ХҮРЭЭНД ХИЙГДСЭН АЖИЛ:
      Ханбогд сумын сум дундын эмнэлэгт 60кВа тог тохируулагчтай тог баригч нийлүүлэн комисст хүлээлгэн өгч ашиглалтын зааварчилгаа өгсөн.
 

ХӨТӨЛБӨРИЙН ҮР ӨГӨӨЖ:

• Ханбогд сумын суурин 7437 хүн ам, хөдөлгөөнт 20000 хүн ам төслийн үр шимийг хүртэнэ
• Эмнэлгийн үйлчилгээний цахилгааны эх үүсвэрээс шалтгаалсан эрсдэл буурна.
• Осол, бэртлийн зургийг цаг алдалгүй авч, эмчилгээ хийх боломж бүрдсэн
• Өвчтөнд хүлээлгэлгүй үйлчлэх, зөөвөрлөхгүй байх боломж бүрдсэн
• Рентген аппаратаар урьдчилан сэргийлэх үзлэг шинжилгээ хийж байна.

ХӨТӨЛБӨРИЙН ХЭРЭГЖИЛТ, ҮР ДҮН:

• Говийн оюу хөгжлийг дэмжих сангийн Удирдах зөвлөлийн 2019 оны нэгдүгээр сарын 24-ний өдрийн хурлын 3 тоот тогтоолоор батлагдсан Зорилтот сумдад жил бүр олгох санхүүжилтийн квотын хүрээнд “Тог баригч” хөтөлбөрийг хэрэгжүүлсэн
• Ханбогд сумын ЗДТГ нь “Говийн оюу хөгжлийг дэмжих сан”-гийн “Төсөл, хөтөлбөр санхүүжүүлэх удирдамж”, “Говийн оюу хөгжлийг дэмжих санд ирүүлсэн саналыг хянан үзэх, үнэлэх, шийдвэр гаргах проткол”-д нийцүүлэн эрэмбэлэх, сонгон шалгаруулах ажлын хэсгүүдийн шийдвэрээр төслийг сонгон шалгаруулсан
• “Говийн оюу хөгжлийг дэмжих сан” нь захиалагч Ханбогд сумын ЗДТГ болон төслийн гүйцэтгэгч “Си Ай Ти” ХХК-тай санхүүжилтийн гэрээ байгуулсан.
• Ханбогд сумын засаг даргын захирамжаар байгуулагдсан ажил хүлээлцэх комиссын шийдвэрээр төслийн ажлыг хүлээж авсан
• Гүйцэтгэгч “Си Ай Ти” ХХК нь төслийн гэрээний ажлыг хугацаанд нь чанартай гүйцэтгэн комисст хүлээлгэн өгснөөр Өмнөговь аймгийн Ханбогд сумын сум дундын эмнэлэгт цахилгааны эх үүсвэрээс шалтгаалсан эрсдэлгүй болж эмнэлгийн үйлчилгээний чанар, хүртээмж дээшлэхэд эерэг дэмжлэг болсон.